Num 21 | Ndebele | STEP | Kwathi inkosi yeAradi, umKhanani, eyayihlala eningizimu , isizwa ukuthi uIsrayeli uyeza ngendlela yabahloli, yalwa imelene loIsrayeli yathumba abanye kubo .

1 Kwathi inkosi yeAradi, umKhanani, eyayihlala eningizimu ^a, isizwa ukuthi uIsrayeli uyeza ngendlela yabahloli, yalwa imelene loIsrayeli yathumba abanye kubo ^b. 2 UIsrayeli wathembisa isithembiso eNkosini wathi ^c: Uba unikela lokunikela lababantu esandleni sami, ngizatshabalalisa imizi yabo ^d. 3 INkosi yasisizwa ilizwi likaIsrayeli, yanikela amaKhanani, wawatshabalalisa lemizi yawo; ngakho wabiza ibizo laleyondawo ngokuthi yiHorma.

Inyoka ezilokutshisa

4 Basebesuka entabeni yeHori, ngendlela yoLwandle oluBomvu ^e ukuze baceze ilizwe leEdoma; lomphefumulo wabantu wadinwa endleleni ^f. 5 Abantu basebekhuluma bemelene loNkulunkulu njalo bemelene loMozisi ^g bathi: Lasenyuselani lisikhupha eGibhithe ukuze sifele enkangala? Ngoba kakulasinkwa njalo kakulamanzi ^h, futhi umphefumulo wethu unengwa yilesisinkwa esilula ⁱ. 6 INkosi yasithuma inyoka ezilokutshisa phakathi kwabantu ^j, zasezibaluma abantu, njalo kwafa abantu abanengi koIsrayeli ^k. 7 Ngakho abantu beza kuMozisi bathi ^l: Sonile, ngoba sikhulume simelene leNkosi njalo simelene lawe ^m; khuleka eNkosini ⁿ ukuze isuse izinyoka kithi. UMozisi wasebakhulekela abantu ^o. 8 INkosi yasisithi kuMozisi: Zenzele inyoka elomlilo, uyibeke esigodweni; njalo kuzakuthi wonke olunyiweyo, nxa eyikhangela, uzaphila. 9 UMozisi wasesenza inyoka yethusi, wayibeka esigodweni; kwasekusithi lapho inyoka ilume loba nguwuphi umuntu, uba ekhangele inyoka yethusi, waphila ^p.

Abantwana bakoIsrayeli babhoda ilizwe lakoMowabi

10 Njalo abantwana bakoIsrayeli basuka bamisa inkamba eObothi ^q. 11 Basuka eObothi, bamisa inkamba eIye-Abarimi enkangala emaqondana lakoMowabi lapho okuphuma khona ilanga ^r. 12 Basuka lapho, bamisa inkamba esigodini seZeredi ^s. 13 Basuka lapho, bamisa inkamba ngale kweArinoni esenkangala ephuma emingceleni yamaAmori; ngoba iArinoni lingumngcele wakoMowabi, phakathi kweMowabi lamaAmori ^t. 14 Ngakho kuthiwa egwalweni lwezimpi zeNkosi: IWahebi eseSufa, lezifula zeArinoni, 15 leliwa lezifula elehlela endaweni yeAri, lisekele umngcele wakoMowabi ^u. 16 Basebesuka lapho baya eBeri; lo ngumthombo iNkosi eyakhuluma ngawo kuMozisi yathi: Buthanisa abantu, ngizabanika-ke amanzi ^v.

17 Khona uIsrayeli wahlabela lingoma ethi: Mpompoza, mthombo! Hlabelelani kuwo ^w, 18 umthombo ezawugebhayo iziphathamandla, ezawugebhayo izikhulu zabantu, ngomnikumthetho, ngendondolo zazo ^x. Basebesuka enkangala baya eMathana. 19 Besuka eMathana baya eNahaliyeli; besuka eNahaliyeli baya eBamothi; 20 besuka eBamothi esigodini esisemhlabeni wakoMowabi, engqongeni yePisiga ekhangele inkangala ^y.

Abantwana bakoIsrayeli banqoba uSihoni loOgi

21 UIsrayeli wasethuma izithunywa kuSihoni inkosi yamaAmori, esithi ^z: 22 Ake ngidabule elizweni lakho; kasiyikuphambukela emasimini loba ezivinini; kasiyikunatha amanzi omthombo; sizahamba ngomgwaqo wenkosi, size sedlule imingcele yakho ^aa. 23 Kodwa uSihoni kamvumelanga uIsrayeli ukudabula umngcele wakhe, kodwa uSihoni wabuthanisa bonke abantu bakhe, waphuma ukumelana loIsrayeli enkangala ^ab, wafika eJahazi, walwa emelene loIsrayeli ^ac. 24 UIsrayeli wamtshaya ngobukhali benkemba, waba ngumnikazi welizwe lakhe kusukela eArinoni kuze kube seJaboki, kuze kube sebantwaneni bakoAmoni ^ad, ngoba umngcele wabantwana bakoAmoni wawuqinile ^ae. 25 UIsrayeli wasethatha yonke le imizi; uIsrayeli wasehlala emizini yonke yamaAmori, eHeshiboni layo yonke imizana yalo. 26 Ngoba iHeshiboni yayingumuzi kaSihoni inkosi yamaAmori, owayelwe emelene lenkosi yamandulo yakoMowabi, wayethethe ilizwe lonke layo esandleni sayo, kwaze kwafika eArinoni. 27 Ngakho abasebenzisa izaga bathi: Wozani eHeshiboni! Umuzi kaSihoni kawakhiwe, umiswe ^af. 28 Ngoba umlilo waphuma eHeshiboni, ilangabi emzini kaSihoni, laqothula iAri loMowabi, amakhosi endawo eziphakemeyo zeArinoni ^ag. 29 Maye kuwe, Mowabi ^ah! Selibhujisiwe, bantu bakaKemoshi ^ai! Unikele amadodana akhe aba ngababaleki, lamadodakazi akhe ekuthunjweni kuSihoni, inkosi yamaAmori. 30 Sesibatshokile; iHeshiboni ibhubhile kuze kube seDiboni ^aj; sesibachithile kuze kube seNofa, efika eMedeba ^ak.

31 UIsrayeli wasehlala elizweni lamaAmori. 32 UMozisi wathuma ukuyahlola iJazeri ^al; basebethumba imizana yalo, baxotsha amaAmori ayehlala khona ^am.

33 Basebephenduka, benyuka ngendlela yeBashani. UOgi inkosi yeBashani wasephuma ukumelana labo, yena labantu bakhe bonke, empini eEdreyi ^an. 34 INkosi yasisithi kuMozisi: Ungamesabi; ngoba ngimnikele esandleni sakho, labantu bakhe bonke, lelizwe lakhe ^ao; njalo uzakwenza kuye njengokwenza kwakho kuSihoni inkosi yamaAmori owayehlala eHeshiboni ^ap. 35 Basebemtshaya, lamadodana akhe, labantu bakhe bonke, akwaze kwasala ophilayo kuye. Badla ilifa lelizwe lakhe ^aq.